Selva Val Gardena

Eitt stærsta samfellda skíðasvæði í heimi

Selva Val Gardena er hluti af hinu stórbrotna svæði, sem kallast Dolomiti Superski og er talið eitt besta og stærsta skíðasvæði heims.

Selva er fallegt fjallaþorp, þar sem ægifagrir tindar Dólómítanna bera við dimmbláan himininn, sem oftast er skafheiður enda er svæðið einkar sólríkt.

Líflegur bær þar sem heimamenn taka vel á móti skíðamönnum á hinum fjölmörgu krám bæjarins með tónlist og ljúffengum drykkjum. Vinsælir "après-ski" staðir eru Laurin Keller og Luis Keller við aðalgötuna í bænum.

Bjarni Freyr er fararstjóri í Selva

Fínustu kaffihús bjóða upp á ilmandi kaffi, eða heitt súkkulaði og girnilegar kökur með þeyttum rjóma.

Tískuverslanir, sportbúðir og sælkeraverslanir með ýmsu góðgæti eru í bænum, auk sérverslana, sem bjóða fallega hluti skorna úr tré en tréskurður er helsta útflutningsafurð Val Gardena svæðisins og á sér aldagamla sögu.

Kláfarnir Champinoi og Dantecepies ganga upp úr bænum og eru öll hótel Úrvals Útsýnar í göngufæri við kláfana. Lyftukostur er fyrsta flokks, nýir og nýlegir kláfar. Heimamenn hugsa einstaklega vel um brekkurnar, sem eru sólríkar og við allra hæfi.

Með því að kaupa lyftukort sem opnar aðgang að öllu Dolomiti Superski svæðinu, fæst aðgangur að 450 lyftum og rúmlega 1.000 km brautum sem flestar eru samtengdar.

Enginn fer frá Selva án þess að skíða hinn vinsæla hring Sella Ronda sem er góð dagsferð með úrvali af skemmtilegum skíðabrautum um nágrannabæina Arabba, Canazei, Colfosco og Corvara.

Í Selva getur þú skíðað á nýju svæði sérhvern dag og fyrir þá kjarkmeiri býðst þyrluflug á Marmolada jökulinn, sem er í yfir 3000 metra hæð og þaðan er skíðað alla leið heim á hótel.

Það toppar enginn Selva!