Tyrkland í hnotskurn

Tyrkland tilheyrir bæði Evrópu og Asíu. Tæplega 3% tilheyra Evrópuhlutanum og hin 97% tilheyra Asíuhlutanum. Landamæri landsins markast af Sýrlandi, Íran, Írak, Armeníu, Georgíu, Búlgaríu og Grikklandi. Stór hluti Tyrklands liggur að hafi. Norðurhluti landsins liggur að Svartahafinu, vesturströndin að Eyjahafinu og suðurströndin að Miðjarðarhafinu. Að flatarmáli er Tyrkland um 780.000 ferkílómetrar eða álíka stórt og Svíþjóð og Noregur til samans.

Veðurfar landsins er mjög breytilegt milli landshluta. Við strendur Svartahafsins í norðri rignir tiltölulega mikið en í suðurhlutanum ræður miðjarðarhafsloftslag ríkjum með mildum sumrum og úrkomumiklum vetrum.

Fjölmennasta borg landsins er Istanbúl en þar búa um það bil fimmtán milljónir manna. Istanbúl er eina borg heimsins sem staðsett er í tveimur heimsálfum, þ.e. í Evrópu og Asíu. Þar er margt athyglisvert að finna svo sem Bláu Moskuna, Sofíukirkjuna, Topkapi höllina og markaðinn ,,Grand Bazar“. Höfuðborg Tyrklands er Ankara en þar búa um fjórar og hálf milljónir manna. Íbúar landsins eru samtals rúmlega 70 milljónir.

Tyrkland er lýðveldi með forseta, forsætisráðherra og þingi. Þingmenn eru 550 og eru þeir kjörnir til fimm ára í senn. Kosningaaldur er 21 ár. Með stjórnarskrá sem tók gildi árið 1923 voru íslömsk lög aflögð og ríki og trú aðskilin.

Mikil verðbólga hefur valdið vandræðum í stjórn efnahagsmála. Landið er misvel fallið til ræktunar en helstu landbúnaðarafurðir eru hveiti, sykur, kartöflur, vínber, bómull, maís og tóbak. Helstu húsdýr eru kindur, nautgripir og hænsni. Tyrkland er tiltölulega auðugt af ýmsum jarðefnum og má í því sambandi nefna kol og olíu. Gjaldeyristekjur hefur þjóðin af útflutningi sements, sítrusávaxta, bómull, gráfíkjum, döðlum, heslihnetum, leðurvörum, rúsínum, málmum, olíu, vefnaðarvöru og tóbaki. Þjónusta við ferðamenn er ört vaxandi atvinnugrein svo og ýmis konar iðnaður.

Það er engin ríkistrú í Tyrklandi en flestir íbúar, eða um 99%, aðhyllast íslamska trú. Eitt prósent landsmanna eru gyðingatrúar og kristnir. Líkt og Gyðingar og kristnir leggja múslimar áherslu á að aðeins beri að tigna einn guð. Spámenn gyðingdóms og kristni, Abraham og Jesú, eru líka spámenn íslams. Í Íslam heitir guðinn Allah og Múhameð er spámaður hans.