GOTT AÐ VITA UM TYRKLAND

FERÐATILHÖGUN, FARARSTJÓRN OG ÖRYGGISREGLUR

Flogið er í beinu leiguflugi til Milas. Flugið tekur 5 ½ klst. Þaðan er ekið í loftkældri rútu til Bodrum og tekur ferðin um 35 mínútur.

Íslenskir fararstjórar okkar taka á móti farþegum á flugvelli og eru þeim innan handar allan dvalartímann.

Akstur til og frá flugvelli erlendis er valkvæð þjónusta. Þeir sem vilja nýta sér aksturinn erlendis bóka og fullgreiða þjónustuna hér heima áður en lagt er af stað í ferð.

Við bendum farþegum sem þurfa á súrefni að halda um borð í millilandaflugi að kynna sér reglur viðkomandi flugfélags.

HANDFARANGUR

Flugmálastjórn hefur gefið út bækling með reglum um handfarangur (pdf) .

GJALDMIÐILL, VERÐLAG OG VERSLUN

Gjaldmiðill er tyrknesk líra (TRY) en víða er tekið við evrum. Reiknaðu út gengið á Oanda.

Greiðslukort eru tekin víðast hvar nema í litlum veitingahúsum og verslunum. Hraðbankar í miðbænum eru opnir allan sólarhringinn.

Verslun í Bodrum er hreinasta skemmtun. Bærinn er fullur af basörum, útimörkuðum og götusölum. Einkum er hagkvæmt að kaupa tyrknesk teppi og dregla, skinn- og leðurvörur, gull- og silfurvörur, merkjavörur í fatnaði, skó, úr, kryddvörur og handklæði. Enda þótt fast verð sæki á er enn þjóðarsiður að prútta.

Hefð er fyrir þjórfé á veitingastöðum (5-10%) en á ódýrari veitingastöðum er ekki nauðsynlegt að gefa þjórfé. Á einstaka veitingahúsum er þjórfé, 10 - 15% innheimt á reikningi. Það er vinsælt en ekki nauðsynlegt að bæta 5-10% við uppgefið verð. Mælt er með að bæta dálitlu við uppgefið verð í leigubílum.

LAND OG ÁFANGASTAÐUR

Tyrkland er 780.000 km² með um 73 milljónir íbúa. Langstærstur hluti landsins tilheyrir Asíu en 3% þess eru Evrópumegin við Bosporussund. Við vogskorna strandlengjuna eru sumrin heit og afar sólrík en vetur mildir með talsverðri úrkomu. Á hálendinu eru vetur harðir en sumur heit og þurr. Í austurhluta landsins er hið sögufræga fjall Ararat (5.137m).

Frá Milas flugvelli til Bodrum eru 50 km.

LÆKNISÞJÓNUSTA OG AÐSTOÐ Í NEYÐARTILFELLUM

Neyðarlínan í Tyrklandi er 112. Fararstjórar útvega læknisaðstoð og veita nánari upplýsingar.

MATUR OG DRYKKUR

Tyrknesk matarhefð er ótvírætt meðal hinna merkustu í heimi en ólík mörgum frægari hefðum að því leyti að erfitt er að benda á eitthvað eitt sem einkennir hana. Fjölbreytni og ferskleiki eru allsráðandi og áhrif sótt í austur jafnt sem vestur.

Veitingastaðir heimamanna heita "lotankas" og eru skemmtilegir heim að sækja. Nærri ströndinni er mikið úrval skyndibitastaða, sjávarréttastaða og prýðilegra alþjóðlegra veitingastaða. Í hádeginu er vinsælt að fá sér kjúkklingakebab í pitabrauði eða ljúffenga tyrkneska pizzu. Internetkaffihús eru víða í Bodrum og Turkireis

SAMGÖNGUR

Smávagnar þeysa um götur Bodrum og nágrannabæjanna  og heita Dolmus. Þeir stoppa þegar þú veifar og eru ódýr og skemmtilegur ferðamáti. Leigubílar eru ódýrir og nóg af þeim.

Bílaleigur biðja um íslenskt ökuskírteini og lágmarksaldur leigutaka er 18 ár. Bifhjólaleigur eru margar og hafa létt bifhjól (“Vespur”) til leigu fyrir þá sem hafa ökuskírteini. Einnig má leigja reiðhjól.

SÍMI OG RAFMAGN

Auðvelt er að hringja úr símaklefum og nota símkort sem hægt er að kaupa á pósthúsum og hjá blaðasölum. GSM þjónusta er góð en mjög dýr.

Rafmagnið er 220-240 volt og tenglar flestir eins og á Íslandi.

SKEMMTUN OG ÍÞRÓTTIR

Í Bodrum er hverskyns vatnasport fyrir alla aldurshópa. Bátar af öllum stærðum og gerðum sem leigðir eru út til lengri eða skemmri tíma. Tennisvellir eru víða og miðnæturknattspyrna er í miklu uppáhaldi. Þeir sem eiga í sæmilegt lið ættu að biðja fararstjóra að útvega verðuga mótherja í landsleik.

Næturlíf er fjölbreytt með úrval af börum og veitingastöðum aðallega  í Gumbet.. Reykingar eru víðast leyfðar og oft boðið upp á vatnspípur á kaffihúsum.

VEÐRIÐ

Meðfylgjandi tafla sýnit meðalhita en hiti getur verið breytilegur frá ári til árs.

ÓMISSANDI Í FARANGURINN

Sundföt, sólarárburður og góða skapið.

TÍMAMISMUNUR

Bætið 3 klst. við íslenskan tíma. Upplýsingar um tímamismun í heiminum.