Benidorm er öllum sóldýrkendum vel kunn enda einn vinsælasti áfangastaður sóldýrkandi Evrópubúa. Benidorm sameinar fjörugt strandlíf og víðfrægt næturlíf og þangað flykkist fólk til að njóta tilverunnar, hvílast og skemmta sér.

Á aðra hönd er Miðjarðarhaf við sólhvítar sandstrendur, á hina rís fjallahringur sem lumar á yndislegum þorpum og óviðjafnanlegum ævintýrum.

Rétt ofan við Benidorm er Terra Mitica, nýr og glæsilegur fjölskyldu- og skemmtigarður. Í garðinum er fjöldi leiktækja, glæsilegra veitingastaða og hápunkturinn fyrir þá hugrökku er svo stórkostlegasti rússíbani Spánar.

Aqualandia er fallegur og tilkomumikill vatnsskemmtigarður fyrir alla fjölskylduna og Mundomar er sædýragarður með höfrunga- og sæljónasýningum.