Gardavatn og nágrenni

Beint flug með Neos til Veróna kl.09:00, lending kl.15:00 að staðartíma.
Rúta flytur hópinn á Hotel Roxy Plaza þar sem dvalið verður í 3 nætur. Morgunverður og kvöldverður innifalinn.

Eftir morgunverð verður haldið til hinnar fögru borgar Vicenza sem staðsett er við rætur Bericofjalls. Vicenza er blómleg borg með ríka sögu og mikla menningu en þar má líta aldagamlar kirkjur og glæsilegar hallir frá endurreisnartímanum ásamt hinum vel þekktu “Palladio” glæsivillum. Saga Vicenza nær allt aftur til annarrar aldar fyrir Krist. Skemmtileg dagsferð með vínsmökkun ásamt nasli. Kvöldverður á hótelinu.

Í dag skoðum við hinar dásamlegu fallegu Feneyjar, hina sögufrægu hálfsökkvandi borg sem þekkt er sem drottning Adríahafsins. Gengið verður um miðbæinn og komið við á helstu stöðum svo sem Markúsartorginu og Rialto brúnni. Öldum saman hafa Feneyjar verið í uppáhaldi meðal listamanna, rithöfunda, kvikmyndagerðafólks og ferðalanga sem koma til að dást að fegurðinni og fá innblástur úr umhverfinu. Síkin sem einkenna Feneyjar voru upphaflega hugsuð sem gatnakerfi og helsta vörn borgarinnar en í dag eru þau eitt helsta aðdráttarafl ferðamanna alls staðar að úr heiminum. Róleg gondólasigling um sögufræg síkin er fullkomin leið til að kynnast borginni og liðast þannig um þrönga vatnavegi og undir gullfallegar brýrnar. Bátsferð frá Tronchetto til San Marco og tilbaka er innifalin.
Kvöldverður á hóteli.

Að morgunverði loknum verður haldið inn í Verónaborg og farið í 2ja tíma skoðunarferð áður en rúta flytur hópinn að Gardavatninu. Veróna er fögur borg sem varð Shakespeare innblástur að verkinu um Rómeó og Júlíu. Hér eru svalirnar sem Júlía stóð á er hún hlustaði á ástarjátningu Rómeós af götunni fyrir neðan og hin fræga stytta af Júlíu sem sagt er að fylgi góð gæfa að snerta. Hér má líka finna hið stórfenglega hringleikahúss Rómverja við Piazza Bra, Arena di Verona, sem enn þann dag í dag þjónar hlutverki sínu sem óperuhús. Hringleikahúsið var byggt árið 30 fyrir Krist og er eitt af best varðveittu byggingum frá fornöld. Eftir þetta flytur rúta hópinn til Padenghe Sul Garda þar sem hópurinn tékkar sig inn á hótelið Le Terrazze Sul Lago, gott 4 stjörnu hótel sem staðsett er stutt frá bökkum Gardavatns.
Kvöldverður á hóteli.

Í dag förum við í skoðunarferð um bæina Sirmione, Lazise og Bardolino og fáum innsýn inn í daglegt líf íbúa við Gardavatnið en það er eitt af stærstu vötnum Ítalíu. Stærð vatnsins veldur því að Miðjarðarhafslofslag skapast þar sem ólífu- sítrónu- og pálmatré dafna og blómstra. Vatnasport er mjög vinsælt sem og gönguferðir og fjallaíþróttir, klifur og hjólreiðar. Ökumenn gleðjast yfir fögru útsýni við aksturinn og göngufólk hrífst af óviðjanfnalegri náttúrufegurð þegar gengið er eftir hinum Gardasa veginum sem tengir saman bæi og þorp umhverfis vatnið. Það er allt hægt við Gardavatn. Í ferðinni verður m.a. farið til bæjanna Sirmione, Garda og Bardolino. Áætluð koma tilbaka á hótelið er um kl.18 – 18:30. Kvöldverður á hóteli.

Í dag kynnumst við listaborginni Brescia sem nú er á heimsminjaskrá UNESCO. Hér má finna stærsta rómverska fornmynjasvæði Norður-Ítalíu og rústir frá tímum Lombarda sem réðu yfir svæðinu á 6.-8.öld. Skemmtileg skoðunarferð um þessa stórkostlegu borg! Haldið verður áfram gegnum hæðótt landslag Franciacorta vínhéraðsins, sem frægt er fyrir hágæða freyðivín, og stoppað til að njóta hádegisverðar ásamt vínsmökkun. Flóknar framleiðsluaðferðir eftir háum gæðastöðlum ásamt litlu framleiðslumagni gerir að verkum að verðmiði á Franciacortavínum getur verið ansi hár! Sumar flöskur fara jafnvel á hundruði punda.
Kvöldverður á hóteli.

Að loknum morgunverði er upplagt að taka sundsprett í sundlauginni eða njóta síðustu sólargeislanna áður en haldið verður heim til Íslands. Tékka þarf út af hótelinu um hádegisbil en hægt verður að geyma töskurnar þar til rúta kemur að sækja hópinn. Keyrt verður á flugvöllinn í Veróna og flogið með beinu flugi með Neos, brottför kl.18:00 að staðartíma, lending í Keflavík kl.20:20 að staðartíma.