Gönguferð um Amalfi og Sorrento á Ítalíu

Við hefjum ferðinar okkar á flugi með Icelandair FI 562 frá Keflavíkur kl. 08:30 og við lendum í Róm kl. 15:00.
Eftir það tekur við akstur til hótelsins Hotel La Vue D’OR í Sorrento.
Fundur með fararstjóra verður á hótelinu þegar hópurinn er kominn þangað.
Fararstjórinn fer vel yfir dagskrá ferðarinnar.

Þessi dagur verður á léttari nótunum. Við heimsækjum hinn skemmtilega bæ Sant’Agata sem gegnir mikilvægara stjórnsýsluhlutverki en stærðin gefur til kynna. Þar sem bærinn stendur efst uppi á hæð gefst kostur á að taka fallegar yfirlitsmyndir yfir Sorrentoskagann. Við heimsækjum líka pizzusnillinginn Antonio sem kennir okkur að búa til ekta ítalska sælkerapizzu, sem við fáum að sjálfsögðu að borða. Þá liggur gönguleiðin niður í Sorrentobæ þar sem við spókum okkur um á léttum nótum.

Þennan dag verður haldið í skoðunarferð um hina víðfrægu Amalfiströnd. Hér nær fegurðin líklega hámarki og ekki að ósekju að UNESCO haldi verndarhendi yfir þessu stórbrotna strandhéraði. Gangan hefst í hinum fallega bæ Ravello. Þaðan verður gengið eftir gömlum asnastígum yfir í “Dal gömlu myllanna” þar sem ferðamenn eru fáir. Lækjarniður, smáir en fallegir fossar, ótrúleg gróðursæld og dulúð í lofti í bland við fornar rústir vatnsmylla gera upplifunina einstaka. Svona var lífið í Amalfi-héraði áður en ferðamenn tóku völd. Göngunni lýkur í Amalfibæ sem er óneitanlega gimsteinn héraðsins. Á heimleiðinni fáum við meðal annars að smakka frábæran sítrónulíkjör, Limoncello, sem er einn af einkennisdrykkjum Suður-Ítalíu.

Eldfjallið Vesúvíus er mógull þessa hluta Suður-Ítalíu og gnæfir yfir Sorrentoskagann og Napólíborg. Skemmst er að minnast ægilegs sprengigoss árið 79 e.Kr. þegar eldskriður eyddu rómversku borgunum Pompeii og Herculaneum. Vesúvíus er í dag þjóðgarður með undurfögrum og áskorandi gönguleiðum. Við munum fara upp á topp og ganga meðfram gígopinu og m.a. fara hjá gufuhverum sem sýna að fjallið er ekki dautt úr öllum æðum. Frá toppi fjallsins gefst enn eitt tækifæri til að njóta frábærs útsýnis. Í dagslok verður komið við hjá vínbónda við rætur fjallsins og bragðað á framleiðslunni.

Deginum eyðum við á hinni sólríku og seiðandi eyju Capri. Eftir stutta siglingu frá Sorrento verður farið í land á eyjunni og gengið um fallegasta hluta hennar, suðaustur svæðið. Hér úir allt og grúir af hellum, klettum og dröngum og tilkomumikil sýn er yfir klettahólmann Faraglioni.

Eftir gönguna verður gengið um þröngar og krókóttar götur uns við fáum tækifæri til að njóta hins ljúfa lífs í hjarta Capri, á torgi hinna fínu og ríku, Piazzetta.

Þennan morgun njótum við leiðsagnar um helstu ferðamannastaðina í hinni líflegu borg Napólí, sem liggur við rætur Vesúvíusfjalls. Við sjáum Piazza del Plebiscito með fallegu konungshöllinni og San Francesco di Paola kirkjunni, Galleria Umberto, hinn glæsilega Maschio Angioino kastala og Santa Brigida kirkjuna (aðeins að utan).

Síðdegis höldum við til Pompeii til að skoða fornar rómverskar rústir (aðgangseyrir innifalinn). Hér sjáum við hvernig undrin í Rómaveldi til forna lifðu af vegna eldfjallsins sem bæði þurrkaði út og varðveitti bæinn á undraverðan hátt, og við höfum tækifæri til að ganga um fornar götur þar sem vagnar fóru um áður og dást að fegurð freskuskreyttra húsa.

Fyrir göngufólk er dagleið dagsins sem draumi líkust; ganga eftir Stíg guðanna (Sentiero deli Dei).

Við veljum að ganga frá austri til vesturs sem er fremur niður á við og því hefst gangan í smábænum Bomerano. Fyrsti hluti göngunnar er að ströndinni en meginhluti leiðarinnar liggur meðfram klettóttri strandlengjunni sem gnæfir hátt yfir haffletinum með ótrúlegu útsýni.
Á göngunni gerum við stopp og fáum okkur snæðing á einum besta útsýnisstað leiðarinnar. Þessi frægi stígur sækir nafn sitt í goðsögn sem segir að hinn gríski konungur Íþöku, Ódysseifur, hafi hér flúið undan Sírenunum (söngmeyjum í fuglslíki sem seiða menn til bana með söng) sem höfðust við á smá-eyjunni Li Galli í hafinu sunnan við Sorrentoskagann.
Formlega lýkur göngunni í bænum Nocelle en við göngum þó áfram til bæjarins Positano.

Brottfarardagur. Akstur frá hótelinu okkar til Rómar.
Við fljúgum frá Róm með Icelandair FI 563 kl. 11:40 og við lendum í Keflavík kl. 15:35.