Balí

Á Balí má kynnast dularfullri og seiðandi menningu eyjarskeggja, sjá dans barongskrímslanna, hlusta á bambus-sílófóna, láta dáleiðast af þokkafullum fingrum og stjörfum augum legong-dansaranna eða færa hindúaguðinum Visnú fórnir. 

Náttúrufegurð Balí er stórkostleg, þar skiptast á tignarleg fjöll og grösugir dalir, beljandi ár og sindrandi lækir, kraumandi eldstöðvar og tær fjallavötn, hvítar strendur og háir sjávarhamrar. Landslagið er því að nokkru leyti kunnuglegt Íslendingum en veðrið og menning íbúanna af framandi toga. Í þessu fagra umhverfi er margt hægt að gera sér til skemmtunar og dægradvalar. 

Á Balí má stunda margs konar æsandi útiveru með leiðsögn fagmanna svo sem köfun, brimbrettabrun, fjallaklifur, fljótasiglingar, kajakadól, skútusiglingar, hjólreiðar, stórfiskaveiðar og margt margt fleira. 

Við komu til Balí er ekið til strandbæjarins Sanúr við austurströnd Badungtanga og á þeim dögum er suðurhluti eyjunnar skoðaðu auk þess sem bærinn sjálfur og nágrenni er kannað. 

Eftir langt flug þar sem farið er austur um átta tímabelti og suður fyrir miðbaug er líka nauðsynlegt að eiga rólega daga og venjast ólíku loftslagi og fá tækifæri til að setja sig inn í þann framandi heim sem bíður ferðalanga á Balí og byrjar ferðin því rólega.

Strandbærinn Sanúr hefur sérstöðu á Balí. Daglegt líf og þarfir ferðamanna fara þægilega saman við hið skrautlega trúarlíf Balíbúa. Fólk af erlendum uppruna sem flust hefur til Balí hefur margt fundið sér heimili í þessum viðfeðma en látlausa bæ. Það setur einnig sinn svip á mannlífið og þann fínlega tón sem er að finna á ýmsum veitingastöðum og í þjónustu. 

Á Sanúr eru fleiri músíkbarir en diskótek og gott úrval af látlausum og rómantískum veitingastöðum í stað þeirra smartheita sem finnast á Seminyak og Kutaströndinni hinum megin á Badungtanganum. Ströndin er aðgrunn með fallegu útsýni að Lembongan Penida eyjunum. Austurströndin gegnir líka mikilvægu trúarlegu hlutverki og nefnist Mata Hari í hindúískum fræðum enda ekki óvænt að rekast á trúarathafnir og samkomur heimamanna við strandlengjuna.

Eftir góða daga við ströndina er haldið til fjalla þar sem dvalið er í hinum mistíska og framandi Úbúdbæ sem hefur mest aðdráttarafl allra staða á Balí fyrir þá sem vilja kynnast sérstæðri menningu, listum og trúarsiðum íbúa Balí. Frá Úbúd er stutt til flestra fegurstu og forvitnilegustu staða á Balí og verður farið í dagsferðir þaðan auk þess sem gengið verður um bæinn með leiðsögumanninum og nágrennið kannað á varfærin og náin hátt.

Það er einhver útópískur hljómur í Úbúd sem fer ekki fram hjá neinum. Bærinn hefur verið þekktur sem miðja handverks og lista í gegnum tíðina og sl. áratugi hefur sú menning eflst með komu erlendra listamanna. Úbúd er víðfeðmur bær sem liggur um hæðir og dali Giyaniar konungsdæmisins. Kjarninn er við gamla markaðinn og konungshöllina þar sem stiginn er barong dans á hverju kvöldi og gammalan tónlist hljómar. Hvergi á Balí er eins auðvelt að nálgast og kynnast arfleifð og menningu eyjarskeggja en í Úbúd. Einstakt handverk jafnt í gömlum tréskurði, silfurverki og steinhöggi sem nútímalegum málverkum og skúlptúr. Þarna eru reyktir blúsbarir og djassbúllur, hippaleg kaffihús í bland við smarta veitingastaði og glæsilega vínbari. Allt er bútík og flott. Það er einhver hönnun og stæll á öllu þarna þó svo að allt sé svo gamalt og rótgróið. 

Frá fjöllum Úbúd er svo haldið austur í hin fornfrægu konungsdæmi Karangasem og Klungkung en áður en hollendingar lögðu Balí undir var Balí skipt upp í átta konungsdæmi og enn gætir mikilla áhrifa þeirra t.d. eru konungsfjölskyldurnar enn með völd í trúarlegum efnum og búa í sínum höllum sem nefnast Puri. Dvalið verður í strandbænum Candidasa í tvær nætur og dómshúsið Kerta Gosa í Klungkung skoðað með sínum einstæðu málverkum sem eru í svokölluðum wayang stíl og öll eru verkin stef við trúarhefð heimamanna. 

Frumbyggjar Balí nefnast Balí Aga og búa þeir í einangruðum þorpum og halda sínum venjum og hefðum óbreyttum frá fornri tíð. Við heimsækjum þorpið Tenganan þar sem okkur gefst kostur á að kynnast menningu þeirra sem er að flestu leiti ólík því sem annarsstaðar finnst á eyjunni.

Á leið frá Candidasa og aftur til Sanúr þegar eftir eru fjórar nætur á Balí verður komið við í Goa Lawah hofinu sem er í helli þar sem þúsundir leðurblaka halda til. 

Á síðustu dögunum á Balí verður aftur dvalið á ströndum Sanúr og alla frídaga eru ótal valfrjálsar ferðir í boði. 

Flugleiðin til Balí

Það er ekki stutt leiðin frá okkar norrænu eyju suður til hinnar suðrænu eyju nánast hinum megin á hnettinum. Því höfum við valið sérlega þægileg flug með Emirates og Icelandair. Einn flugmiði alla leið sem gefur fólki möguleika á að innrita farangur alla leið frá Keflavík til Denpasar á Balí og um leið að hafa tengiflugin tryggð.

Hótelin á Balí

Dvalið verður á afbragðs hótelum á þremur stöðum á eyjunni:

Á ströndum Sanúr verður gist á Puri Santrian hótelinu sem er eitt af elstu og traustustu hótelum í Sanúr og hefur verið uppáhald fjölda gesta sem snúa þangað aftur og aftur til að njóta strandarinnar og þeirra tengsla sem hótelið hefur við lista- og menningarlíf bæjarins. 
Sérlega vel staðsett með fjölda veitingastaða rétt við. Þarna er góð heilsulind, öndvegis veitingastaðir og barir.

Í fjallabænum Úbúd verður dvalið á The Ubud Village sem er einfaldlega best staðsetta hótelið í bænum á miðri Monkey Forest götunni umvafið veitingastöðum, verslunum, listagalleríum og allri mögulegri þjónustu.

Á vesturlandinu verður dvalið á Ramayana í Candidasa sem er dýrindis höll niður við ströndina þar sem rúmgóð og vel útbúin herbergi og afbragðs veitingastaðir gera grunn að paradísarvist. Og að sjálfsögðu er heilsulind og nudd á staðnum og stöndin hrein dásemd.

Hafðu samband við asiuferdir@uu.is og við sendum nánari upplýsingar um ferðina.