Róm og Miðjarðarhafssigling

Beint flug með Icelandair til Rómar. Brottför er kl.08:30 frá Keflavík, lending í Róm kl.15:00 að staðartíma. Rúta flytur hópinn á Villa Glori hótelið þar sem gist verður fyrstu nóttina.

Í dag tökum við daginn snemma, fáum okkur morgunverð, tékkum okkur út af hótelinu og förum með rútu inn í miðborg Rómar þar sem við munum skoða borgina. Meðal þess sem verður skoðað eru Spænsku þrepin, breiðustu tröppur Evrópu, en breska ljóðskáldið John Keats bjó og lést í einni af villunum við þessi þrep. Húsið er safn í dag. Næst er gengið að Trevi gosbrunninum í hjarta Rómarborgar sem er einn sögufrægasti gosbrunnur í heimi, rómaður fyrir fegurð og frábæra stemningu. Þaðan er gengið áfram til hins fræga Pantheon hofs en súlurnar sextán sem styðja við þakið koma alla leið frá Egyptalandi en þaðan voru þær fluttar með erfiðismunum á sleðum, fluttar yfir hafið og dregnar inn í Rómaborg. Hver súla vegur um 60 tonn. Ekki þykir síður merkilegt að undir þykkum marmaranum liggja tveir konungar Ítalíu og ítalski málarinn og listamaðurinn Raphael. Endað verður á torginu fagra, Piazza Navona sem hefur allt til að bera, þrjá dýrðlega gosbrunna, Bernini skúlptúra og fjölmörg kaffihús þar sem hægt er að setjast niður og njóta mannlífsins. Þriggja klukkustunda gönguferð á rólegum hraða með enskumælandi staðarleiðsögumanni og íslenskum fararstjóra.

Hádegisverður snæddur á ítölskum veitingastað, 2ja rétta máltíð er innifalin ásamt vatni og kaffi. Eftir þetta er farið tilbaka í rútuna sem keyrir hópinn að höfninni í Civitavecchia þaðan sem gengið er um borð í skemmtiferðaskipið Smeralda. Lagt er úr höfn kl.18:30 og þá er tilvalið að slaka á og njóta alls þess sem skipið hefur uppá að bjóða.

Skipið leggur að höfn í Genoa, við ítölsku rivíeruna, kl.08:30 að morgni.

Þessi fallega borg hefur af nógu að taka, þar má meðal annars finna byggingar frá 17.öld, heillandi þröng húsasund troðfull af ævagömlum verslunum, sjarmerandi gömlu höfnina, stærsta fiskabúr Ítalíu og listaverkið Kúlan á hafinu eftir Renzo Piano. Genoa er borg sem kemur skemmtilega á óvart! Hægt er að kaupa skipulagðar skoðunarferðir um borð í skipinu. Munið að vera komin tímanlega tilbaka um boð í skipið,

lagt er úr höfn frá Genoa kl.18:00.

Komið er til Marseille kl.09 að morgni og verður hægt að kaupa skipulagðar skoðunarferðir um borð í skipinu. Ekkert er þó því til fyrirstöðu að skoða borgina á eigin vegum. Munið bara að vera komin tímanlega tilbaka um borð þegar skipið fer úr höfn kl.18.

Marseille er elsta borg Frakklands, stofnuð af Grikkjum árið 600 f.Kr. Frábær staðsetning borgarinnar við Miðjarðarhafið hefur frá upphafi stofnunar hennar gert hana að vinsælum áningarstað og má þar sjá greinileg áhrif frá jafnvel mjög fjarlægum menningarheimum. Marseille, stundum kölluð “Napólí Frakklands”, er litrík og glaðleg borg en í henni er mikil matarmenning og margt áhugavert að sjá.

Lagt að höfn í Barcelona kl.08:00. Hér er nóg að gera og því tilvalið að taka daginn snemma.

Í borginni er bæði Picasso safnið og nýstárlegt samtímalistasafnið Macba. Ennfremur eru margar litríkar og stórmerkilegar byggingar eftir Antoní Gaudí sem og dómkirkjan fræga Sagrada Familia sem enn er ekki búið að klára, en bygging hennar hófst árið 1882. Hvort heldur sem valið er að rölta um þröngar götur í Barrio Gothico, þræða tapasbari og rölta um Römbluna, versla í tískuverslunum eða kíkja á listasafn, þá er Barcelona borgin fyrir þetta allt saman og miklu meira! Eins og áður þá verður hægt að kaupa skipulagðar skoðunarferðir um borð í skipinu.

Lagt úr höfn kl.18:00 stundvíslega.

Kl.07:00 er komið til Cagliari á Sardiníu.

Sögulegur miðbærinn með fögrum kirkjum og litríkum húsum, langar strendurnar, þúsund ára löng sagan… Alls staðar er eitthvað áhugavert að finna. Borgin er byggð á 7 hæðum eins og Róm, staðsett milli hvítra kalksteinskletta og hafsins. Þar má finna urmull góðra veitingastaða ásamt fornu hringleikahúsi. Hægt er að kaupa skipulagðar skoðunarferðir um borð í skipinu.

Lagt af stað frá Cagliari kl.16:00 stundvíslega.

Komið til Napólí kl.10:00 að morgni.

Hér verður að til kl.20:00 og um að gera að nota daginn vel. Hægt er að skoða borgina og smakka á ítalskri pizzu eins og þær gerast bestar. Einnig er hægt að kaupa skipulagðar skoðunarferðir um borð í skipinu.

Passið að vera komin tímanlega aftur um borð fyrir brottför kl.20:00.

Komið verður að Civitavecchia höfninni í Róm kl.08:00 að morgni.

Hópurinn yfirgefur skipið með föggur sínar og rúta keyrir okkur á vit ævintýra í Rómarborg en nú verður skoðunarferð sem heitir “Hin forna Róm”. Göngutúr um rústir eins mesta heimsveldis allra tíma.

Byrjað er í Colosseum hringleikahúsinu, byggt á árunum 72 til 80 eftir Krist og var upphaflega gjöf til Rómarbúa. Hringleikahúsið var notað í 100 daga leikunum, bardögum skylmingarþræla og villidýra og öðrum svipuðum skemmtunum. Það var mikið notað til ársins 217 en þá varð byggingin fyrir eldingu og skemmdist. Með tímanum voru margir steinar teknir úr byggingunni til að byggja nýjar byggingar, til dæmis var mikið magn af marmaranum notað í Péturskirkjuna. Á síðari tímum hefur Colosseum, eða það sem eftir er af því, orðið eins konar tákn fyrir borgina og hið forna Rómaveldi. Næst er farið að Sigurboga Konstantínusar og að Palatine hæð en Palatínhæð er ein hinna sjö hæða Rómar og sú þeirra sem kemst næst því að vera í miðjunni. Hún er 70 metra há og öðrum megin við hana stendur Circus Maximus en hinum megin Forum Romanum. Samkvæmt rómverskri goðafræði fann úlfynja ungabörnin Rómúlus og Remus á Palatínhæð og hélt þeim á lífi. Innifalið: Enskumælandi staðarleiðsögumaður ásamt íslenskum fararstjóra.
Eftir skoðunarferðina verður farið á Villa Glori þar sem gist verður í þrjár nætur.

Frjáls dagur í Rómaborg. Valfrjáls skoðunarferð í Vatíkanið. Keypt aukalega í bókunarferli.

Frjáls dagur í Rómarborg.

Um hádegisbil sækir rúta hópinn og keyrir út á flugvöll.

Brottför kl.16:00 með Icelandair flugi FI563, lending í Keflavík kl.18:45 að staðartíma.