Sigling um gríska eyjahafið

Beint flug með Neos til Veróna.
Brottför frá Keflavík kl.09:00 með NO5958, lending í Veróna kl.15:00 að staðartíma.
Rúta flytur hópinn á Hotel Murales Art Hotel í útjaðri Verona. Þriggja rétta kvöldverður er innifalinn ásamt morgunverðarhlaðborði daginn eftir.

Að morgunverði loknum verður farið í skoðunarferð um Veróna. Eftir hádegið keyrir rúta hópinn að Port Marghera höfninni, sem er við Feneyjar, og gengið verður um borð í skemmtiferðaskipið Costa Deliziosa. Um borð í skipinu má meðal annars finna 7 sundlaugar og heita potta, 12 bari ásamt setusvæðum bæði úti og inni, 5 veitingastaði og snakkbari, leikhús þar sem boðið er upp á kvöldskemmtanir, íþróttasvæði, heilsulind, verslanir og margt fleira. Lagt verður úr höfn kl.17:00 stundvíslega og siglt af stað til Bari.

Komið er til Bari á Ítalíu kl.14:00 að staðartíma.
Bari er höfuðborg Pugliahéraðsins á Suður-Ítalíu. Upprunalega var Bari grísk nýlenda en varð síðar mikilvægur ítalskur verslunarstaður. Elsti borgarhlutinn (Bari Vecchio) er á höfða milli gömlu og nýju hafnarinnar en í honum er eins tíminn hafi staðið í stað. Þar má finna þröngar litlar götur, börn í fótbolta, eldri menn að reykja og spjalla, eldri konur að hengja upp þvott og 40 kirkjur!
Ekki gleyma að rölta um gömlu höfnina þar sem fiskibátarnir koma að landi með feng dagsins og selja fenginn beint úr bátnum.
Í Bari má einnig finna lengsta hafnargarð Ítalíu sem byggður var af Mussolini á sínum tíma, Longomare. Lagt verður úr höfn kl.20:00.

Siglt áleiðis til grísku eyjanna og tilvalið að nýta daginn til þess að slaka á í sólbaði, sundi eða í heilsulindinni.
Allir ættu að finna eitthvað við sitt hæfi.

Komið er til eyjunnar Mykonos kl.08:00 að morgni. Mykonos er hluti af Cyclades eyjaklasanum og er af mörgum talin ein af fegurstu eyjum gríska eyjahafsins. Hér má finna hin fallegu og hefðbundnu hvítu hús með bláskreyttum þökum, þröngar götur og fallegar strendur. Líflegt næturlíf er á eyjunni sem dregur nafn sitt af hetjunni Mykonos sem var sonarsonur guðsins Apollo í grísku goðafræðinni. Skipulagðar skoðunarferðir á vegum Costa Cruise má kaupa um borð í skipinu. Munið að vera komin tímanlega tilbaka, lagt er úr höfn kl.20:00 að staðartíma. Kl.22:30 er komið að Mykonos Bay þar sem stoppað verður í 3 tíma áður en haldið er áfram til Santorini.

Komið er til eyjunnar Santorini kl.08:00 að morgni en Santorini er ein þekktasta og fallegasta eyjan í eyjahafinu ásamt Mykonos.
Útsýni er ægifagurt yfir gíginn, eyjarnar og hafið en margir listamenn hafa fengið innblástur á eyjunni og sest þar að. Fjöldi verslana með fallega listmuni og handverk er að finna á eyjunni og ómissandi er að setjast niður á veitingastað með fallegu útsýni og njóta.
Skipulagðar skoðunarferðir á vegum Costa Cruise má kaupa um borð í skipinu.
Lagt er úr höfn kl.18:00 að staðartíma.

Kl.12:00 á hádegi er komið til Katakolon. Katakolon hefur verið áfangastaður skemmtiferðaskipa síðan á fimmta áratugnum.
Í aðeins hálftíma fjarlægð frá höfninni er að finna hinar fornu rústir Olympiu, en þaðan er hugmyndin að nútíma Ólympíuleikum sprottin. Í Olympiu fór fram keppni í þrótti og fimi frá árunum 800 f.Kr til ársins 400 e.Kr. Komu aðilar víða að til að etja kappi á leikunum en á þeim tíma var héraðið Olympia helgað guðinum Seifi (Zeus) úr grísku goðafræðinni. Enn má finna leifar af u.þ.b. 70 byggingum og musterum á svæðinu.
Þeir sem vilja sleikja sólina og njóta grískrar matargerðar geta t.d. heimsótt strandbæinn Kyparissia.
Skipulagðar skoðunarferðir á vegum Costa Cruise má kaupa um borð í skipinu.
Munið að vera komin tímanlega tilbaka,lagt er úr höfn kl.18:00 að staðartíma.

Dagur til að njóta alls þess sem skipið hefur upp á að bjóða. Stoppað verður á breiddargráðu 36.2 N og 24.2 E í Ionian hafinu milli kl.23:30 og 00:30 um kvöldið og mun þar gefast einstakt tækifæri til stjörnuskoðunar undir handleiðslu skipsáhafnar.

Komið er að höfn kl.09:00 að staðartíma og bátur flytur hópinn frá höfninni yfir yfir til Feneyja þar sem farið verður í einstaklega skemmtilega
skoðunarferð. Stoppað verður í Tronchetto og farið með bát yfir að St. Markúsartorginu og tilbaka. 2ja tíma gönguferð um miðju Feneyja er innifalin í skoðunarferðinni. Seinni part dags verður hópurinn fluttur aftur tilbaka á hótel Muraless Art Hotel og er þriggja rétta kvöldverður innifalinn.

Að morgunverði loknum tékkar hópurinn sig út af hótelinu og keyrt verður með rútu að Gardavatninu. Þar munum við fara í skemmtilega skoðunarferð í bæjunum Lazise og Sirmione, en einnig gefst frjáls tími í hádeginu til að rölta um, njóta fegurðarinnar, fá sér gott að borða og jafnvel versla svolítið.

Seinni partinn flytur rútan hópinn á flugvöllinn í Veróna þar sem flug NO7959 fer í loftið kl.18:00 og lendir í Keflavík kl.20:20 að staðartíma.