Sigling um Miðjarðarhafið

Beint flug með Icelandair til Barcelona.
Brottför frá Keflavík kl.08:25 með FI596, lending í Barcelona kl.14:40 að staðartíma.
Rúta flytur hópinn á hótelið Catalonia Gracia sem er gott 4 stjörnu hótel vel staðsett í miðri borginni.

Að morgunverði loknum verður farið í heilsdagsskoðunarferð um borgina en Barcelona er full af list og sögu, mannlífi og gleði. Þar er margt að sjá og er borgin fyrir marga hluti, t.d. töfrandi arkítektúr svo sem Sagrada Familia kirkjuna stórkostlegu, dýrindis matargerð, frábært knattspyrnulið, svakalega fínar strendur, stórbrotin söfn, góðar verslanir og margt margt fleira.

Rúta flytur hópinn frá hótelinu að höfn þar sem gengið verður um borð í hið glæsilega skip Costa Toscana.
Lagt er úr höfn kl.18:00 og siglt áleiðis að 40.4N, 003.2 E Balearic Sea.
Áætluð koma þangað er kl.23:30 þar sem verður stoppað í um klukkustund og dáðst að stjörnubjörtum himni fyrir þá sem það vilja.

Kl.08:00 verður lagt að höfn á Ibiza.
Fjöldi skoðunarferða eru til kaups hjá Costa Cruise en einnig er hægt að skoða sig um á eigin vegum. Ibiza er fræg fyrir fallegar strendur með grænbláu vatni og bröttum klettum, falleg þorp, dýrindis matargerð, tónlistarveislur, lúxusveitingastaði og margt fleira. Menningararfur Ibizabúa kemur frá mörgum mismunandi menningarheimum gegnum aldalanga sögu þeirra. Lagt verður úr höfn frá Ibiza kl.18:00 að staðartíma.

Komið er til Palermo kl.8 að morgni og er hægt að velja um fjölda skoðunarferða til kaups hjá Costa Cruise. Höfuðborg Sikileyjar hefur verið menningarlegur suðupottur síðan Fönikíumenn og Grikkir börðust um hana á 5. Og 6.öld f.Kr. Sikiley, einu sinni rómversk, svo býsönsk, arabísk, normönsk og að lokum ítölsk, sameinaðist meginlandi Ítalíu loks árið 1861. Dásamlegir markaðir, fögur torg, aldagamlar kirkjur ásamt stórbrotinni sögu og menningu! Hér er margt að skoða og sjá. Hægt er að kaupa skipulagðar skoðunarferðir um borg hjá Costa Cruise eða kanna á eiginvegum. Lagt er úr höfn kl.16:30.

Lagt er að höfn í Civitavecchia nálægt Róm kl.8:30 og tekur u.þ.b. klukkustund að keyra inn í borgina. Hægt er að kaupa skipulagðar skoðunarferðir á vegum Costa Cruise um borð en einnig er hægt að taka leigubíl og kanna borgina á eigin vegum. Munið að vera komin tímanlega tilbaka en lagt verður úr höfn frá Civitavecchia kl.19:00 stundvíslega, svo mælt er með því að leggja af stað frá Róm eigi síðar en 17:30. Siglt verður áfram að Pelagos Sanctuary sem er eina alþjóðlega hafsvæðið sem tileinkað er verndun sjávarspendýra. Það var stofnað með marghliða samningi milli Frakklands, Ítalíu og Mónakó sem var undirritaður í Róm árið 1999. Meginhlutverkið er að stuðla að verndun hvaldýra og búsvæði þeirra gegn t.d. mengun, hávað, föngun fyrir slysni o.fl. Áætluð koma þangað er kl.23:30 og verður stoppað hér í um klukkustund. Á svæðinu má sjá bæði hvali og höfrunga og þar á meðal nokkrar tegundir sem eru í útrýmingarhættu.

Kl.08:30 verður lagt að höfn í Savona sem staðsett er í Liguria héraðinu á Ítalíu.
Liguria héraðið er þekkt sem ítalska rívíeran vegna fjölmargra strandbæja sem þekja strandlengjuna beggja vegna við Genoa sem er höfuðborg héraðsins. Savona er sannur gimsteinn hvað varðar list, sögu og menningu en borgin hefur sannarlega upplifað tímana tvenna. Einn frægasti íbúi Savona er Kristófer Kólumbus en skoða safn þar sem er í enduruppbyggingu af húsinu sem hann bjó í.
Hægt er að kaupa skipulagðar skoðunarferðir um borð hjá Costa Cruise en einnig er hægt að skoða borgina á eigin vegum.
Siglt er frá Savona kl.18:00.

Komið er til Marseille kl.08:30 að morgni og verður hægt að kaupa skipulagðar skoðunarferðir um borð í skipinu. Einnig er hægt að skoða borgina á eigin vegum. Munið bara að vera komin tímanlega tilbaka um borð þegar skipið fer úr höfn kl.18:30.
Marseille er elsta borg Frakklands, stofnuð af Grikkjum árið 600 f.Kr. Frábær staðsetning borgarinnar við Miðjarðarhafið hefur frá upphafi stofnunar hennar gert hana að vinsælum áningarstað og má þar sjá greinileg áhrif frá jafnvel mjög fjarlægum menningarheimum. Marseille, stundum kölluð “Napólí Frakklands”, er litrík og glaðleg borg en í henni er mikil matarmenning og margt áhugavert að sjá.

Komið er að höfn í Barcelona kl.08:00 að morgni. Rúta tekur á móti hópnum og keyrir á Hotel Catalonia Gracia.
Hægt er að geyma töskurnar þar þangað til hægt er að tékka inn á hótelið eftir hádegi og er tilvalið að skoða sig betur um í borginni á meðan eða slaka á við sundlaugina á þaki hótelsins.

Fátt jafnast á við að rölta um forn stræti Gotneska hverfisins, rölta um Barceloneta hverfið við sjóinn eða jafnvel fara á ströndina.
Í borginni er bæði Picasso safnið og hið nýstárlega samtímalistasafn Macba. Ennfremur eru margar litríkar og stórmerkilegar byggingar eftir Antoní Gaudí sem og dómkirkjan fræga Sagrada Familia sem enn er ekki búið að klára, en bygging hennar hófst árið 1882.
Hvort heldur sem valið er að rölta um þröngar götur í Barrio Gothico, þræða tapasbari og rölta um Römbluna, versla í tískuverslunum eða kíkja á listasafn, þá er Barcelona borgin fyrir þetta allt saman og miklu meira!

Að morgunverði loknum er tilvalið að klára síðustu kaupin eða njóta veðurblíðunnar á góðu kaffihúsi.
Um hádegisbil flytur rúta hópinn út á flugvöll en þangað þarf að vera kominn um kl.13.
Flug FI597 fer frá Barcelona kl.15:45 að staðartíma og lendir í Keflavík kl.18:20 að íslenskum tíma.